Öflugt skólastarf sem vekur athygli
Framsókn í Reykjanesbæ vill tryggja að markmiðum nýrrar menntastefnu sveitarfélagsins verði náð. Við höfum lagt ríka áherslu á að bæta starfsumhverfi starfsfólks í leik- og grunnskólum og að styðja við nema í fagnámi þeirra. Í leik- og grunnskólum okkar er mikill mannauður sem þarf enn ríkari stuðning. Framsókn vill tryggja að umbótastarf haldi áfram því við trúum að með því að styðja við fagmennsku og vellíðan í starfi þá tryggjum við að í sveitarfélaginu verði áfram öflugir starfshópar í skólasamfélaginu sem leiða þróunarstarf í menntamálum.
- Háskólamenntun í heimabyggð! Leitum leiða til að skapa fjölbreytt tækifæri til menntunar í samvinnu við háskólana. Byggjum upp Menntasetur í samstarfi við helstu aðila í menntasamfélaginu á Suðurnesjum.
- Höldum áfram að bæta starfsumhverfi með fjölbreyttum leiðum, Reykjanesbær á að vera leiðandi í því að bjóða upp á faglegt og skapandi starfsumhverfi.
- Byggjum nýjan grunnskóla í hjarta Ásbrúarhverfis, hér þarf að hefjast handa sem allra fyrst.
- Nýsköpunar- og þróunarsjóður gegnir mikilvægu hlutverki í menntasamfélaginu, mikilvægt skref sem við ætlum að stíga er að auka framlög til hans strax um 100%.
- Setjum kraft í að endurnýja skólalóðir. Það gagnast ekki bara skólunum heldur öllum í hverfinu.
- Við heyrum hvað unga fólkið okkar segir og viljum leita leiða til að styrkja stoðþjónustu skólanna með fjölbreyttum hópi fagfólks s.s. félagsráðgjöfum, skólaráðgjöfum eða öðrum trúnaðarmönnum sem nemendur geta leitað til innan skólanna.