Fjölbreytt ATvinnulíf

Hlutverk Reykjanesbæjar er að skapa fyrirtækjum sem hér starfa framúrskarandi starfsumhverfi sem laðar að öflugt og hæft starfsfólk. Það eru sóknarfæri í atvinnulífinu og margir sem leita eftir tækifærum fyrir utan borgina. Reykjanesbær þarf að leiða vagninn og gera fyrirtækjum á svæðinu kleift að blómstra samhliða því að vinna markvisst að því að auka fjölbreytni í atvinnulífinu. Að því ætlar Framsókn í Reykjanesbæ að vinna.
 

• Samfélagið í Reykjanesbæ er í grunninn byggt upp af sterkum tengingum við sjávaröflin, styrkjum tengsl okkar við eina af undirstöðuatvinnugreinum landsins og tryggjum að viðhaldsklasi sjávarútvegsins rísi við Njarðvíkurhöfn.
• Við höfum rætt það opinberlega að við viljum Landhelgisgæsluna í heild sinni til Reykjanesbæjar, meginþungi í starfsemi gæslunnar er nú þegar á svæðinu.
• Störf án staðsetningar eru hluti af nútíma atvinnulífi. Atvinnulífskjarni í Reykjanesbæ styður við einstaklinga sem vinna í störfum án staðsetninga og eins líka þeim sem starfa hjá fyrirtækjum á höfuðborgarsvæðinu en vinna fjarri vinnustaðnum ákveðna daga í viku. Vinnum saman með atvinnulífinu að því að aðstaða sé til staðar fyrir þennan hóp í bænum okkar.
• Tryggjum raforkuöryggi með Suðurnesjalínu 2.
• Reykjanesbær býr nú þegar að öflugum fyrirtækjum í landeldi sjávarafurða og tengdum atvinnugreinum, nýtum þá þekkingu sem er til staðar og stuðlum að því að landeldi eflist enn frekar m.a. með nýtingu auðlinda sem Reykjanesvirkjun skapar.
• Verum í forystu þegar kemur að uppbyggingu á flugvellinum. Uppbygging þar er ekki einkamál þeirra sem hann reka og viðhafa starfsemi þar. Íbúar Reykjanesbæjar leggja til vinnuafl, loftrými, vegi og aðra innviði sem stórir vinnustaðir þurfa á að halda. Reykjanesbær sem stærsta sveitarfélagið á svæðinu og mikilvægasti hagsmunaaðilinn að rekstrinum á að hafa sterkari tengingu inn í daglegan rekstur þar.
• Stærstu fyrirtækin í samfélaginu hafa mikið um það að segja hvernig bæ við byggjum, leitum leiða til þess að þau verði öll virkir þátttakendur í samfélaginu og styðji við menningar-, íþrótta- og tómstundastarf. Allir með, ekki bara sumir.
• Þetta er ekki búið! - enga mengandi stóriðju í Helguvík og segjum bless við kísilverið.
• Reykjanesbær eigi sæti í stjórnum þeirra ríkisfyrirtækja og stofnana sem hafa starfsemi á svæðinu.
• Vinnumiðlunarþing  í samstarfi við atvinnulífið. Hefjum kröftugt samstarf við Vinnumálastofnun, Virk og aðra tengda aðila til að koma öllum sem geta unnið í vinnu eða virkni. Rjúfum félagslega einangrun! Virkni eykur vellíðan.
• Bjóðum stofnanir sem hafa umsvif á svæðinu okkar velkomin s.s. Tollstjóra, Útlendingastofnun, Ferðamálastofu og fl.