Áfram ábyrgur rekstur

Reykjanesbær er stærsta fjölmenningarsamfélag landsins og á sama tíma mest vaxandi sveitarfélag landsins. Það er af mörgu að taka í rekstri samfélagsins og það er mikilvægt að hafa í huga við alla ákvarðanatöku að bæjarfulltrúar eru að taka ákvarðanir fyrir hönd og í umboði íbúa bæjarins. Það þarf að vanda til verka og það þarf að ganga til verka. Framsókn í Reykjanesbæ hefur sýnt það í verki síðastliðin fjögur ár að við göngum í málin og við ætlum að halda áfram veginn með hagsmuni okkar sem byggjum þetta samfélag í fyrsta sæti.
    

• Áframhaldandi ábyrgur rekstur bæjarins. Á nýliðnu kjörtímabili losnaði Reykjanesbær undan eftirlitsnefnd sveitarfélaga vegna skulda fyrri ára. Mikilvægt er að við byggjum upp bæinn okkar á ábyrgan og sjálfbæran máta.
• Einföldum alla nálgun að þjónustu bæjarins og tryggjum að íbúar geti fengið þjónustu á sínum forsendum, stóreflum rafræna þjónustu á sama tíma og við tryggjum aðgengi að hefðbundnum þjónustuleiðum. Hugum sérstaklega að því að við erum fjölmenningarsamfélag og erum stolt af því.
• Almenningssamgöngur þurfa að ganga í takt við þarfir íbúa, tryggjum að þær séu skipulagðar á þann máta.
• Styðjum við fjölbreytta samgöngumáta til að mynda með því að tryggja að hjólreiðaáætlun Reykjanesbæjar komist í gagnið
• Sjálfbært samfélag til framtíðar. Reykjanesbær á að tryggja að í boði séu fjölþættir möguleikar þegar kemur að móttöku úrgangs. Tryggja þarf að auðlindir verði ekki að úrgangi  að óþörfu. Notum til þess fjölbreyttar leiðir, endurvinnum, endurnotum, endurframleiðum, gerum við og deilum aftur út í samfélagið. Látum hringrásarhagkerfið virka.